DIRECCIÓN : ALEJANDRO NAFRÍA

Técnicu superior d’imaxe. Anque la so carrera profesional ta averada al mundu de la fotografía, debuta na dirección con esta película documental.
Como fotógrafu autónomu, trabayó en estremaos campos siendo’l so favoritu’l fotoperiodismu. Collaboró colos diarios Le Monde, Asturias24 y na revista Neville. Tien espublizaos trés llibros: La Hierba más verde (A buen Paso), Gente de Nod (KRK) y La rebelión empieza leyendo (Ediciones Bajamar).

GUIÓN, DIRECCIÓN DE FOTOGRAFÍA Y MONTAXE : JUAN TIZÓN

Direutor de fotografía y realizador. Como realizador trabayó nel campu musical roblando decenes de videoclips p’artistes como Alfredo González, Fe de ratas o Nacho Vegas, tamién conciertos como’l 25 aniversariu de Barón Rojo. Como direutor de fotografía trabayó en videoclips como “Pa llegar a tu lado” d’Enrique Bunbury, curtiumetraxes de ficción, publicidá y documentales como Se Dice Poeta (2014), Writing Heads (2013), Filandón Fornelo (2011) o Black is Black (2017). Recibió diversos premios polos sos trabayos tantu como direutor de fotografía como pol so trabayu como realizador de videoclips. Dende 2006 ye una de les dos pilastres de la productora Señor Paraguas. Amás participó en diverses esposiciones artístiques, colectives y propies, principalmente como fotógrafu. La última Ciudad de vacaciones: el tiempo secuestrado (2015).

GUIÓN : JORGE ALONSO

Llicenciáu n’hestoria, con un Máster en formación del Profesoráu, coautor al pie d’Enrique A. Mastache y Juan J. Alonso de la saga El Antiguo Egipto en del cine, La Antigua Grecia en el cine, La Antigua Roma en el cine y La Edad Media en el cine (T&B Editores), autor de Compartiendo las semillas. Nick Cave & The Bad Seeds (66Rpm), triunviru de Rema y Vive Editorial, cantante ocasional , guionista, collaborador n’El Comercio, Neville o la Ruta 66 y redactor en La Radio es Mía (Rpa), tien el dineru por castigu.

AYUDANTE DIRECCIÓN : PABLO A. QUIROGA PRENDES

Ye cineasta, xestor cultural, y dirixe la productora Algamar Producciones dende la que realiza trabayos n’estremaos ámbitos culturales, ente los que rescampla nos últimos años el llabor discográficu. Filmó dellos curtiumetraxes que foron premiaos en dalgunos festivales: L’añu de los trés ochos (2001), Aida (2003), Apetito desesperado (2003), Trés Versiones (2007), Bisarmes (2009) y Ea la mio neña, Ea(2013).
Apasionáu pol llabor documentalista tien nel so haber filmes rellacionaos cola hestoria de la educación n’Asturies y que son parte de los fondos del Muséu Etnográficu de la Escuela Rural d’Asturies, o venceyaos a les hestories de colectivos y personaxes asturianos.
Como nun cree neso de que quien munchu abarca poco apreta, tamién realizó trabayos audiovisuales rellacionaos cola música, el teatru y la danza. Nos últimos tiempos el so llabor céntrase nel estudiu y promoción del usu del audiovisual nel sistema educativu. Amás, ye maestru nuna escuela de primaria.

SONÍU Y MÚSICA : ANÍBAL MENCHACA

Músicu y musicólogu. Creador multidisciplinar, grabó una docena de discos con distintes bandes, realizó un curtiumetraxe (“Pera”, 2013) y editó un poemariu (“Circunscripción de la garrapata”, 2015 (creo) Suburbia). Premio AMAS a la meyor BSO de curtiumetraxe. Compaxina’l so desarrollu creativu cola grabación de soníu pa cine y documental. El so últimu trabayu foi na última película del realizador gallegu Lois Patiño (que ta por salir).

AYUDANTE PRODUCCIÓN : ANA IGLESIAS

Técnica de Soníu (2001-2003 Geninfor, Avilés / 2004 Microfusa, Barcelona) y Producción Audiovisual, Radio y Espectáculos (2013-2015 Cislan. La Felguera).
Mientres cuatro años dedicóse al montaxe d’espectáculos en Barcelona (Sonar, Primavera Sound, Rolling Stones, O2..). Dempués d’unos años como Xefa de Sala nel teatru de La Llaboral en Xixón, entama a trabayar na producción de cine col llargumetraxe Impávido (2010-Asturies), al que-y siguen Diamantes Negros (Madrid-2012), La Isla del vientu (Salamanca-2014), Pozoamargo (Cuenca-2014), The Night Watchmen (Asturies-2015). Participó tamién en curtiumetraxes como La Llamada (2015-Xixón), Agostu (2016-Asturies), Pensamientos (2016-Madrid) , videoclips de Nacho Vegas o Alfredo Gonzalez y publicidá pa Central Llechera Asturiana o El Corte Inglés. Anguaño dedica tantu a la producción de cine como a la producción d’eventos, conciertos y festivales como Metrópoli, L.Y.V, FICX, BIME PRO…

OPERADOR DE CÁMARA : MIGUEL SUÁREZ

Historiador de formación, operador de cámara d’oficiu y animador de rodaxes por necesidá vital. Como operador de cámara cubrió eventos deportivos, videoclips, espectáculos teatrales, documentales… tamién trabayó en delles películes como The Night watchman (2016) y Enterrados (2018) nel departamentu de producción. Collaborador habitual en Señor Paraguas.

DIRECCIÓN D’ARTE : AIDA TRABANCO

Llicenciada en Comunicación Audiovisual, trabayó una temporada nun muséu ente vistíos de boda vitorianos y pósters contraculturales.
Collabora fielmente nos proyectos de la productora Señor Paraguas. Suel ocupase de dici-y a la xente que sale en cámara qué ropa toca ponese, mover muebles pelos escenarios, y atopar o fabricar elementos d’atrezo a cuál más bizarro. Les sos habilidaes inclúin vistir maniquíes en metanes d’escampleros pela nueche o prender fueu a cuadernos en restoranes.

MAQUILLAXE Y PELUQUERÍA : ANDREA G. TRABANCO

Dempués de formase en peluquería y estética, en 2011 entama a especializase en carauterización pal mediu audiovisual.
Dende la so participación nel curtiu «No soy como tu» (El Médano Producciones,2012)’,trabaya na realización de videos musicales (Nacho Vegas,Alfredo González, Anabel Santiago, Hulls House…), Curtios ( “Pera”,” La llamada”,”Wade”), Spots televisivos ( “Avilés acción”,” Mamatayoe”, “HC, Comunicalia”), y el Llargumetraxe ” The night Watchman”. Trabayos casi na so totalidá, bien averaos a la productora “Sr. Paraguas”.

FOTO FIXA Y REDES : ÓSCAR D. RODRÍGUEZ

Estudió Hestoria del Arte en Madrid y vivió en distintes ciudaes. A la so vuelta a Xixón atopóse con una ciudá camudada, vampira y perruna.
Pon discos cuando-y dexen, collabora en podcasts cuando pué y fai semeyes cuando lo piden.

PRODUCCIÓN ASOCIADA : INÉS ROMEO Y ALFONSO S. SUAREZ