Mar Álvarez

Muyer multipantalla onde les haya, la so carrera va d’ Undershakers a Petip Pop, sorrayando’l  presente continuu maraviyosu que supón Pauline en la Playa, el so llabor didáuticu en Musicópolis va acabar siendo un referente universal.

Alicia Álvarez

Periodista, poeta, columnista lúcida, cuentista lluminosa, percorrió al pie del so hermanu’l camín de Swam, onde muncho hubo y hai qu’esbrozar, que xune Undershakes con Pauline en la Playa y caltién una mirada crítica para cuntalo y para siguir caminando.

Xandru Fernández

Profesor de Filosofía na enseñanza secundaria, autor de diez noveles, seis poemarios y trés llibros de relatos n’asturianu, la so última obra hasta la fecha ye “El ojo vago” (Pez de plata, 2016) y ye capaz de fundir la mitoloxía griega con Nick Cave.

Xabel Vegas

Llicenciáu en Ciencies Polítiques, anguaño trabaya nuna ONG, foi columnista en prensa, agora ye posible, y bien recomendable, sigui-y en Redes Sociales, afiláu y informáu ente’l ruíu, batería en Manta Ray robló un discu notable cola formación Xabel Vegas y Las Uvas de La Ira.

Isabel Muñiz

Rexenta un bar imprescindible en Xixón, y nel planeta tierra, La Vida Alegre, y dende ellí defende la necesidá de la música y los músicos en direutu, de la mesma que lo fai poniendo la so voz de fumu sele en Buen Suceso, una banda ente’l jazz y el boleru, clásica, non impostada.

Toli Morilla

El cantautor asturianu amosó la so solvencia en discos lo mesmo en castellán como n’asturianu, y una auténtica maestría al tornar a esti idioma’l siempres complicáu cancioneru de Dylan, un héroe na trinchera.

Coru Internacional Matriarcal Antifascista Al Altu la Lleva.

El coru más faltosu que’l cuál nun ye quien a ser pensáu nació mirándose nel espeyu de Ladinamo y Patio Maravillas, pero foi mutando y sumando nomes en pie d’igualdá al so orixinal, tanto mutó qu’agora tien direutor y entidá propia más allá del repertoriu de Nacho Vegas. Bona amuesa de la so diversidá son Arantxa Carcedo,  y Ester Roldán.

Arancha Carcedo

Pescadera esplotada y militante convencida nel PC y nel Coru Internacional Matriarcal Antifacista Al Altu la Lleva

Ester Roldán

Arquiteuta con formación musical clásica, comparten voces y fatigues nesti Coru deliciosu.

Ramón Lluís Bande

El cineasta, músicu y escritor asturianu collaboró nos trés ámbitos mentaos con Nacho Vegas y robláu una obra ambiciosa y tan complicada n’ocasiones como imprescindible, esixendo a quien mira, llee o escucha y calteniendo una posición de clase insobornable.

Miguel García

Miguel forma parte de la Plataforma d’Afeutaos pola Hipoteca d’Asturies (PADH), que lleva faciendo un llabor cansosu y indispensable dende’l golpe d’estáu financieru, atendiendo a quienes se vieron na cai o amenazaos con ello.

Marisa Álvarez

Marisa ye otru exemplu de les casuístiques y el trabayu que se realiza dende la PAHD para desaniciar los desastres del sistema.

César Rendueles

Foi parte xuntu al maestru Luis Navarro de los tristemente curtios Detritus X, profesor de Socioloxía na Universidá Complutense de Madrid, autor de llibros yá fundamentales como Sociofobia (Capitán Swing, 2013), Capitalismo Canalla (Seix Barral, 2015) o En bruto. Una reivindicación del materialismu históricu (Los libros de la catarata, 2016), tien una visión clara y un verbu certeru y cáustico, imprescindible.

Sofía Castañón

Poeta y diputada de Podemos, una d’eses voces articulaes y amoblaes que tendría d’escuchase y lleese en cada ocasión, dende la so estancia na Residencia d’Estudiantes pudo diagnosticar la guapura firida de la so tierra y dende’l so trabayu políticu impulsó y impulsa una serie de midíes que van haber de conformar les reformes de xéneru que yá tendríen de ser.

Fame Poétika

Esti colectivu poéticu empezó a trabayar la poesía dende la cai, los chigres y el direutu, micrófonu en mano y de frente, tienen dos poemarios editaos y decenes de vénetos a llombos, Nacho Wings, Diego Solís o Cristina García son bona amuesa d’un grupu mozu y heteroxeneu que se mueve con soltura en castellán y asturianu, y sabe de versos seles tanto como de versos embravecíos.

Pablo Und Destruction

Pablo fizo cuatros discos que raspien la perfección, entemeciendo la escuridá berlinesa colos monstruos que pueden habitar viesques y meses camiella, enllenos de soníos tropezosos, tienros o contundentes y lletres propies d’un xamán bien informáu, tamién fai radio o teatru, y remana un cantidá d’información mayara considerable.

Jorge Alonso

Escritor, profesor de cine y hestoria lo mesmo que de música popular, redactor en La Radio es Mía (RPA) y collaborador de medios de comunicación como El Comercio, Neville o Ruta66, ye ún de los triunviros de Rema y Vive Editorial y músicu ocasional.

Adolfo P. Suárez

Pintor y illustrador con dolce esposiciones individuales nel so haber, collaboró con Nacho Vegas na portada de La Zona Sucia (Marxophone, 2011) y protagonizando’l so “Adolfo Suicide”, la so visión descarnada del mundu plásmase nunos edificios que tremecen fermosos y tarrecibles.

Manu Molina

L’únicu músicu qu’acompañó a Nacho Vegas mientres tola so carrera, con un Máster en percusión, ye profesor na escuela de música xixonesa Meidinerz y un maraviyosu baterista de jazz, y de tolo que-y pongan per delantre.

Iker González

Músicu y promotor multimedia, ye una de les cabeces pensantes tres Two Monkeys y el festival Metrópoli, ente otres aventures, foi productor nel FICX y coleiciona una cantidá d’anécdotes de los noventa a esta parte que-y convierten nel meyor cronista imaxinable d’un tiempu y un país.

Fee Reega

Cantautora talentosa y mundial, evocadora, sensual y etérea, la so música en solitariu ye d’una guapura espectral non exenta de contundencia, y cuando se pon el traxe de Captains esplota nun frenesí de post punk baillable, cada vez que xube al escenariu ye una esperiencia irrepetible, suya ye la voz de“Mi novio es bobo” y discos tan rellumantes como “La raptora” (Pauken Grabaciones, 2014) o Sonanbulancia (Humo. 2016)

Nacho Álvarez

Baxista de Manta Ray y creador del Bar La Plaza de Xixón, puntu neurálxicu de muncho de lo meyor que-y pasó a la ciudá y a la escena independiente, el so proyectu Nacho Álvarez y el Cuarteto Bendición ye d’una solidez respigante.

Luis Rodríguez

Músicu infatigable, picó piedra en decenes de bandes y proyectos, especialmente Alto Volto y por supuestu’l mesmu Nacho Vegas con quien empieza a tocar en Lucas XV, al pie d’otros músicos habituales de Nacho, Abraham Boba, Edu Baos y César Verdú, formó León Benavente en 2012, seique la meyor noticia de la música popular española dende entós.

Nacho Vegas

¿De veres? Músicu y poeta, venga, va.

Perrín

Apareció per ellí y Juan Tizón violu. ¿Cómo nun diba salir?.